Казан университетының тарихи прозекторлык часовнясын мәдәни мирас объекты дип таныйлар
Кремль урамы, 35а адресы буенча урнашкан, 1840 нчы елда төзелгән прозекторск часовнясы региональ әһәмияттәге мәдәни мирас объектлары реестрына кертеләчәк. Бина архитектор М.П. Коринфский проекты буенча төзелгән һәм Университет клиникасы каршындагы анатомик тикшеренүләр өчен билгеләнгән гәүдәләрне саклау өчен файдаланылган. Тарихи-мәдәни экспертиза объектның тарихи һәм архитектур кыйммәткә ия булуын күрсәтте.
XIX гасырның икенче яртысында медиклар ихтыяҗлары өчен анатомия театры җитми, шуңа күрә 1860-1870 елларда мәетләрне анатомия театрында гына түгел, Университет клиникасы часовнясында да ачалар. 1890 елларда бу часовняда гәүдәләрне җыялар.
Часовня XIX гасыр ахыры-XX гасыр башы медицина учреждениеләренең ярдәмче корылмалары үрнәге булып тора. Бина үзенең оригиналь планировкасын һәм төп конструкцияләрен, шулай ук классицизм архитектурасы элементларын саклап калган: кырыс сызыклар, симметрияле фасад, гөмбәз.
Шунысын да билгеләп үтәргә кирәк, часовня 2020 елда реставрацияләнгән, шуның нәтиҗәсендә аның архитектура үзенчәлекләрен һәм эчке планировкасын саклап кала алганнар. Бу бинаны заманча уку программаларында куллану гына түгел, ә студентларга һәм килүчеләргә тарихи архитектура үрнәкләрен күрсәтергә дә мөмкинлек бирә. Реставрациядән соң бинада «Теология» фәнни-белем бирү үзәгенең уку корпусы урнашкан, анда студентлар укый.
ТР Мәдәни мирас объектларын саклау комитеты тарихи бинаны дәүләт реестрына кертергә планлаштыра, бу аны киләчәк буыннар өчен саклап калырга мөмкинлек бирәчәк.