Совет чоры монументаль сәнгате әсәрләрен саклау мәсьәләсе буенча аңлатмалар
Реестрга совет чоры монументаль сәнгатенең аерым әсәрләрен кертүдән баш тарту турындагы карарлар 73-ФЗ номерлы федераль закон нигезендә кабул ителә.
Закон тарихи-архитектура, сәнгать яисә мемориаль кыйммәткә ия бина яисә корылманың тулысынча мәдәни мирас объекты була алуын күздә тота. Аерым панно, мозаика яки сграффито, әгәр алар бинаның архитектур чишелешенең бер өлеше булса, реестрга мөстәкыйль һәйкәлләр буларак кертелә алмый. Мондый очракларда саклау статусы бинаның үзенә бирелә, ә аның декоратив элементлары – мозаикаларны һәм панноны да кертеп – автомат рәвештә дәүләт саклавында тора. Комитет, һичшиксез, мондый әсәрләрнең Татарстан Республикасы тарихы һәм мәдәнияте өчен кыйммәтен һәм аларга аерым игътибар кирәклеген таный.
Әйтик, агымдагы елның февралендә ачыкланган мәдәни мирас объектлары исемлегенә Казандагы Кәрим Тинчурин исемендәге паркта смальт мозаикалы В.И.Ленин һәйкәле кертелгән иде. Якын киләчәктә әлеге объектка региональ әһәмияттәге мәдәни мирас объекты статусын бирү ниятләнә.
Бер үк вакытта мондый һәйкәлләрне саклау эше дә алып барыла: Татарстан Республикасы Мәдәният министрлыгы республиканың монументаль сәнгать объектларының аларны исәпкә алу һәм саклау өчен махсус реестрын төзү эшен башкара.
Татарстан Республикасы Мәдәни мирас объектларын саклау комитеты диалогка ачык һәм, үз карарларының хокукый нигезен аңлатып, кергән таләпләргә даими җавап бирә. Якын арада эксперт һәм иҗтимагый берләшмә вәкилләре белән монументаль сәнгать әсәрләрен саклау мәсьәләләре турында фикер алышу планлаштырыла. Мондый диалог позицияләрне чагыштырырга һәм уртак мәдәни мирасны саклауга юнәлдерелгән чишелешләр эзләргә ярдәм итәр дип өметләнәбез.