Зөядә тарихи архив бинасын коткару эшләре башланды

Татарстан Республикасының мәдәни мирас объектларын саклау комитеты Зөядә XIX гасыр ахыры уникаль архитектура һәйкәле – региональ әһәмияттәге мәдәни мирас объекты статусына ия булган Зөя земство идарәсе архивы бинасында аварияләргә каршы эшләр башкаруга рөхсәт бирде. Белгечләр провинция классицизмының якты үрнәге һәм утрау-шәһәрчек архитектура ансамбленең мөһим өлеше булган тарихи корылманы ныгыту буенча комплекслы проектны гамәлгә ашыруга керештеләр. Реставраторлар бинаның тарихи чынлыгын саклау өчен заманча технологияләр кулланачаклар: фундаментны махсус составлар ярдәмендә ныгытачаклар, стеналарга кирпеч салуны известь эремәләре белән инъекцияләү ысулы белән торгызачаклар һәм гөмбәзләрне көчәйтәчәкләр. Конструкцияләрне дымнан һәм уттан саклауга, шулай ук объектның алга таба җимерелүен булдырмау өчен вакытлыча түбә ясауга аерым игътибар биреләчәк. "Башкарыла торган эшләр - бинаны торгызу гына түгел, ә Зөя тарихының мөһим битен саклау. Земство идарәсе архивы – Р оссиядә земство үзидарәсе чорының кыйммәтле шаһиты һәм республикабызның архитектура мирасы үрнәге", - дип билгеләп үтә Татарстан Республикасының мәдәни мирас объектларын саклау комитеты рәисе Иван Гущин. Аварияләргә каршы чаралар тарихи бинаның торышын тотрыклыландырырга һәм аны алга таба тулы масштаблы реставрациягә әзерләргә мөмкинлек бирәчәк, ул һәйкәлгә элеккеге бөеклеген кайтарачак һәм аны Татарстан халкы һәм кунаклары өчен уңайлы итәчәк.