Казан каймасы мәдәни мирас объектлары реестрына кертелде

Бөек Ватан сугышында Җиңүнең 80 еллыгын бәйрәм итү кысаларында Татарстан Республикасы тарихи хәтерне саклауда мөһим адым ясады.

Мәдәни мирас объектларының бердәм дәүләт реестрына Бөек Ватан сугышы вакыйгалары һәм геройлары белән бәйле 28 объект һәм истәлекле урын кертелгән.

Яңа саклана торган объектлар арасында – мемориаль комплекслар, азат итүче сугышчыларга монументлар, Советлар Союзы Геройлары бюстлары, кардәшлек каберләре һәм хәрби каберлекләр. Аларның һәрберсе совет халкының батырлыгы һәм Татарстан халкының Бөек Җиңүгә керткән өлеше турындагы хәтерне саклау өчен аерым әһәмияткә ия.

Яңа мәдәни мирас объектлары исемлегендә Казан әйләнәсе аерым урын алып тора – Кайбыч муниципаль районында урнашкан, 1941-1942 елларда Казанны саклау өчен төзелгән уникаль оборона корылмалары комплексы. Хәзер корылма региональ әһәмияттәге мәдәни мирас объектлары реестрына кертелгән, бу аны киләчәк буын өчен саклап калырга мөмкинлек бирәчәк. 

Казан каймасының озынлыгы 331 км булган – бу танкка каршы чокырлар, дзотлар, землянкалар һәм башка инженерлык корылмалары системасы. Аны төзүдә республикада яшәүче дистәләгән мең кеше, нигездә хатын-кызлар, яшүсмерләр һәм өлкән яшьтәге кешеләр катнашкан, алар бик авыр шартларда, еш кына кулдан, оборона рубежын булдырганнар.