Казанның Адмиралтейство бистәсендәге беренче социаль шәһәрчекне мәдәни мирас объектлары реестрына кертәчәкләр
Комитет заказы буенча дәүләт тарихи-мәдәни экспертизасы уздырылды – Казанның беренче социаль шәһәрчеген Россиянең тарихи һәм мәдәни һәйкәлләре реестрына кертү өчен уңай бәяләмә алынды. Хәзер 5,2 гектар мәйданлы бу уникаль квартал, истәлекле урын буларак, дәүләт тарафыннан өстәмә яклау табачак.
Торак комплекс 1928-1949 елларда Адмиралтейство бистәсендәге хәзерге Адмиралтейская, Урицкий һәм Кече Мәскәү урамнары чикләрендә төзелгән һәм Казанның социаль шәһәрчеге – автоном җирлек принциплары буенча төзелгән беренче комплексы булган, анда яңа заводлар белән бергә торак йортлар, балалар бакчалары һәм социаль инфраструктура учреждениеләре барлыкка килгән. Бүгенге көндә шәһәр формалаштыручы 14 тарихи кыйммәткә ия объект сакланып калган. Алар арасында атаклы «Йолдызлы йорт» – совет конструктивизмының бер үрнәге аерылып тора.
Күп кенә биналар бүген ашыгыч реставрация таләп итә, 60% ка якыны авария хәлендә. Инфраструктураны яңарту һәм кварталның тарихи йөзен саклау өчен зур капитал кертергә кирәк.
Татарстанның Мәдәни мирас объектларын саклау комитеты рәисе Иван Гущин әлеге адымның мөһимлеген ассызыклады: «Без совет индустриализациясе чорында Казанның нинди булуын, беренче эшче районнарының ничек тууын һәм ул чор идеяләрен нинди архитектура чагылдыруын күрсәтүче мирасны саклыйбыз».