Татарстанның Мәдәни мирас объектын үстерү концепциясе конкурсы финалында Россия һәм Кытай командалары катнашачак

Конкурска йомгак 18 апрельдә Казанда ясалачак, вакыйганы һәйкәлләр һәм тарихи урыннар көненә багышлап уздырачаклар. Исегезгә төшерәбез, Татарстанда республика Хөкүмәте ярдәме белән 2024 елның 5 ноябреннән 2025 елның 18 апреленә кадәр Бөтендөнья мирасы объектын (ЮНЕСКО) үстерү концепциясен эшләүгә «В.П. Энгельгардт Астрономия обсерваториясе» халыкара конкурсы уза. Конкурс «Яңарыш» Республика фонды, Россия архитектура һәм төзелеш фәннәре академиясе, Һәйкәлләрне һәм истәлекле урыннарны саклау буенча халыкара советның милли комитеты (ИКОМОС, Россия) тарафыннан үткәрелә. Конкурс эшләре халыкара экспертлар жюрисы тарафыннан бәяләнәчәк. Обсерватория – гомуми мәйданы 19 гектарга якын булган җиде уникаль мәдәни мирас объектыннан торган комплекс, 2023 елда ЮНЕСКО Бөтендөнья мирасы исемлегенә кертелгән, бу аның фән һәм мәдәният өчен әһәмиятен ассызыклый. Конкурсның максаты – тарихи мирасны саклау, Татарстанның Зеленодольск районында урнашкан В.П. Энгельгардт исемендәге Астрономия обсерваториясенең туристлык потенциалын заманча файдалану һәм үстерү. Ярымфиналга проект эшләрен Россиянең профильле югары уку йортларыннан Мәскәү, Санкт-Петербург, Казан, Новосибирск, Екатеринбург, Түбән Новгород һәм Донецк Халык Республикасыннан 13 команда, шулай ук Шаньдун архитектура университетыннан (Кытай) 5 команда тәкъдим итте. Конкурста катнашу өчен Россиядән һәм чит илләрдән 12 профильле югары уку йорты гариза биргән. Гариза биргән конкурсантлар арасында Әрмәнстанның архитектура һәм төзелеш Милли университеты студентлары һәм өч Кытай югары уку йорты студентлары бар. Барлыгы 37 команда формалаштырылган, аларның абсолют күпчелеген Кытай командалары тәшкил итә (23 команда). «Бу проект уникаль мәдәни һәйкәлләрне саклап калырга ярдәм итеп кенә калмый, бәлки халыкара җәмәгатьчелекнең игътибарын киләчәк буыннар өчен мирасны саклауның мөһимлегенә дә җәлеп итә», - дип хәбәр итте мәдәни мирас объектларын саклау буенча Татарстан Республикасы Комитеты рәисе Иван Гущин.