Айбаш авылындагы борынгы мәчетне реставрацияләү барышы турында республика ММЧ сөйләделәр
Татарстанның мәдәни мирас объектларын саклау комитеты журналистлар өчен Биектау районының Айбаш авылында матбугат туры үткәрде, анда 20 нче гасыр башындагы уникаль агач төзелеш сәнгате объектын масштаблы реставрацияләү дәвам итә. Реставраторлар һәрбер бүрәнәне һәм ниргәне саклап, бинаны сак кына торгызалар. Күп кенә чын элементлар сакланып калган.
Мәдәни мирас объектларын саклау буенча Татарстан Республикасы Комитеты рәисе Иван Гущин сүзләренә караганда, мәчеттә соңгы ремонт 1994 елда булган, 2022 елның октябрендә мәчетнең нигезе черегәнгә һәм давылга бәйле рәвештә манарасы егылып төшкән, бу ремонт кирәклеген тизләткән. ТР рәисе Рөстәм Миңнеханов кушуы буенча комитет ашыгыч рәвештә объектны консервацияләде һәм объектны реставрацияләүнең проект документациясен әзерләү буенча эш алып бара башлады. Республика бюджетыннан 4,8 млн сум бүлеп бирелгән.
Реставрация эшләренең төп өлеше мәчеттә түгел, ә Лаеш районының Сокуры авылындагы реставрация базасында башкарылган. Инде аннан реставрацияләнгән элементларны кире мәчеткә алып кайталар иде.
Реставрация барышында белгечләр фундаментны ныгытканнар, бураны, өслекләрне реставрацияләгәннәр,корылма конструкцияләрен, түбәсен һәм, әлбәттә, манараны алыштырганнар. Хәзер тәрәзә колодалары реставрация процессында. Якындагы планнарда-интерьерны һәм керү төркемнәрен, ике маршлы баскычны һәм порталь колонналарны торгызу. Соңгы этапларда мәчетне профильле такта белән тышлаячаклар һәм буяу эшләренә керешәчәкләр. Мәчетне охра төсләренә буярга ниятлиләр. Мәчетне торгызганда архив фоторәсемнәре кулланылган.
Шулай ук якындагы территорияне төзекләндерү эшләре дә каралган. Мәчет янында тәһәрәтханә – агач белән тышланган һәм металл түбәле сэндвич-панельләрдән модульле бина урнаштырачаклар.
Татарстан Республикасы Биектау муниципаль районының Айбаш авылында XX гасыр башында төзелгән мәчет төбәк әһәмиятендәге мәдәни мирас объекты булып тора. Бина ул чорның татар авыл культлы архитектурасы үрнәге булып тора.
Төп реставрация эшләре хәйрия акчаларына бара. Эшләрне якынча җәй көне төгәлләргә планлаштыралар.