Алексеевск-Әлмәт трассасында борынгы авылны тапканнар
Татарстан Республикасы Чистай районында «Алексеевск-Әлмәт автомобиль юлының күпфункцияле зонасын төзү» объекты өчен бүлеп бирелә торган җир кишәрлекләренә тарихи-мәдәни экспертиза үткәрү кысаларында археологик разведкалар барышында тикшерүчеләр тарафыннан моңа кадәр билгеле булмаган «Татар Баганасы, 1 нче авыл» исеме алган археология һәйкәле ачыкланды. Һәйкәл X-XIV гасырларга карый.
Һәйкәл Татар Баганасы авылыннан 1,7 км төньяк-төньяк-көнчыгышта урнашкан. Ул Идел Болгарының X-XIV йөзләрдәге гади авылыннан гыйбарәт, ул урман кырыендагы инешнең югары агымында барлыкка килгән. Табылдыклар арасында Идел Буе Болгарының түгәрәк керамика калдыклары да бар. Шулай ук тимердән эшләнгән аз санлы әйберләр (пычаклар, кадаклар) һәм йорт хайваннары сөякләре ватыклары табылган.
Хәзерге вакытта Татарстан Мәдәни мирас объектларын саклау комитеты объектны дәүләт саклавына алган, һәйкәл территориясенең чикләрен һәм файдалануның махсус режимын раслау турындагы боерык әзерләнгән һәм дәүләт теркәве уза. Археологик мирас объектын саклап калу максатында проект документациясе составында археология һәйкәленең сакланышын тәэмин итү бүлеге эшләнә.