Татарстанда эшмәкәрләр мәдәни мирасны саклау өчен 3 тарихи бинаны бары тик 1 шәр сумга сатып ала ала
2001 нче елның 21 нче декабрендәге 178-ФЗ номерлы Федераль закон нигезендә, инвесторлар тарихи биналарны ташламалы бәядән, 5 ел эчендә торгызу бурычы белән сатып ала ала. Реставрациядән соң бу объектлар, сәнәгать объектларын исәпкә алмаганда, яңа максатларга - музей һәм рестораннардан алып кунакханә комплексларына кадәр җайлаштырыла ала. Бу адым республиканың мәдәни мирасын саклау һәм авария хәлендәге объектларны хуҗалык әйләнешенә кертү өчен эшләнелә.
Хәзерге вакытта Алабугада һәм Чистайда 3 тарихи бина бар, алар – төбәк өчен һәм җирле әһәмияттәге биналар.
Алабугада XIX гасырның "Земство ирләр училищесы каршындагы торак йорт" сатуга куелган иде, әмма гаризалар бирү вакыты инде 30 сентябрьдә тәмамланды.
Алабуга районы башкарма комитеты мәгълүматлары буенча, якын киләчәктә XIX гасырның тагын ике объектын сату планлаштырыла. Алар - «1890 елгы шәһәр училищесы бинасы» һәм 1852 елгы «Мещанин Новиков утары флигеле».
Чистайда эшмәкәрләр өч объектны карый ала: «К.А. Тренев, П.А. Павлеченко яшәгән йорт», XIX гасырга караган «Капкалы ике катлы ярым таш торак йорт» һәм «XIX гасыр уртасындагы торак йорт».
Муниципалитетның Чистай районы Башкарма комитеты сүзләренә караганда, алар, төрле чорлардагы торак йортларны да кертеп, тагын 11 объектны сатуга чыгарырга планлаштыралар:
• «XX гасыр торак йорты»
• «XIX гасыр торак йорты»
• «Рәшәткәле ике катлы агач торак йорт»
• «Аттиклы ике катлы кирпеч торак йорт»
• «XIX гасыр ахырындагы сәүдә кибетендәге торак йорт»
• «XIX гасыр сәүдә кибете белән торак йорт»
• «XX башы торак йорты»
• «XIX гасыр сәүдәгәре Шәмсетдинов йорты»
• «XIX гасыр уртасының А. С. Лихачев утары»
• «XIX гасыр уртасының Логутовлар торак йорты".
ТР Җир һәм мөлкәт мөнәсәбәтләре министрлыгы архитектура мирасын саклауга өлеш кертергә теләүчеләр өчен сәүдәгәр Каретниковның Бауман урамындагы 66 нчы йортын сатуга чыгарырга планлаштыра.
2022 нче елдан Татарстанда 13 тарихи объект яңа хуҗаларын тапкан инде. Мәдәни мирас объектларын саклау буенча Татарстан Республикасы Комитеты рәисе Иван Гущин билгеләп үткәнчә, объектны саклау һәм реставрацияләүгә таләпләр дәүләт тарафыннан билгеләнгән. Сатып алучының бурычы – проект документациясен эшләүне, реставрация эшләрен башкаруны тәэмин итү. Әгәр яңа хуҗа йөкләмәләрен үтәмәсә, дәүләт объектны кире алырга хокуклы. Программа уникаль тарихи биналарны саклап калырга гына түгел, ә эшмәкәрләргә Татарстанда яңа мәдәни һәм туристик үзәкләр ачу мөмкинлеге дә бирәчәк.
Сатуларда катнашырга теләүче инвесторлар җирле үзидарә органнарына мөрәҗәгать итә алалар.