«Татарстанның сакланып калган һәйкәлләре арасында аналоглары юк»: Михляев сукно фабрикасы бинасы мәдәни мирас объекты булачак
ТР Мәдәни мирас объектларын саклау комитеты танылган Казан сәүдәгәре һәм меценаты Иван Михляевныкы булган элеккеге Сукно мануфактурасы биналарының берсен РФ халыклары мәдәни мирас объектларының (тарихи һәм мәдәни һәйкәлләренең) бердәм дәүләт реестрына кертү буенча дәүләт тарихи-мәдәни экспертизасының уңай бәяләмәсен алды.
«Сукно фабрикасы комплексының чиркәү-мәхәллә мәктәбе бинасы» ачыкланган объектка экспертиза үткәрү вакытында подваллы, мансардалы һәм янкормалы бер катлы кирпеч корылманың XVIII гасыр уртасындагы сәнәгать архитектурасына каравы ачыкланган.
Турыдан-туры дәлил итеп белгеч бина фасадында сакланган металл мемориаль нигез тактасын һәм андагы текстны китерә: «1753 елның 1 сентябрендә хуҗа Федор Дмитрич Дряблов әфәнде үзенең балалары Иоанн Феодорыч, Петр Феодорыч үз капиталы белән шул Сукно фабрикасын төзеде». Бу Казан өчен документлаштырылган даталанган сәнәгать төзелешенең бик сирәк очрагы булып тора.
Архив документларын өйрәнгәннән соң, эксперт сәнәгать бинасының фабрика ведомствосыннан епархия ведомствосына тапшырылуын раслый торган мәгълүматларны тапмаган, аны уку йорты буларак идентификацияләүне тулысынча кире каккан.
Барокко стилендәге тарихи бинаның төп үзенчәлеге – баганасыз гөмбәзле түшәмәләр. Алар XVIII гасыр уртасындагы сәнәгый төзелеш сәнгате өчен уникаль конструкция булып тора һәм Татарстанның сакланып калган һәйкәлләре арасында аналоглары юк, алар илнең башкала һәм Урал сәнәгать үзәкләреннән читтә бик сирәк очрый.
Бинаны атрибутлаштырып, эксперт аны «Казан Сукно мануфактурасының (Дрябловлар-Михляевлар) җитештерү бинасы», 1753 ел, 1968 ел (Петербург ур., 50 йорт, 5 корпус) дип атарга һәм төбәк әһәмиятендәге мәдәни мирас объекты статусын бирергә тәкъдим итә.