Мергасов йорты: Комитет иҗтимагый фикер алышу нәтиҗәләрен бастырды
ТР Мәдәни мирас объектларын саклау комитеты «1938-1941 елларда танылган балалар язучысы Абдулла Алиш яшәгән йорт. 1931-1952 елларда күренекле татар язучысы Кави Нәҗми яшәгән йорт» төбәк әһәмиятендәге мәдәни мирас объектын саклау буенча фәнни-проект документациясенә дәүләт тарихи-мәдәни экспертизасы бәяләмәсе буенча иҗтимагый фикер алышу кысаларында кергән тәкъдимнәр җыелмасын бастырып чыгарды.
Дзержинский урамы, 18 адресы буенча урнашкан тарихи бина Казан халкына күбрәк Мергасов йорты буларак билгеле.
Документлар Комитет сайтында 2 сентябрьдә урнаштырылды. Иҗтимагый фикер алышу 11 сентябрьдә тәмамланды.
РФ Хөкүмәтенең 25.04.2024 ел, № 530 карары белән расланган Дәүләт тарихи-мәдәни экспертизасы турындагы нигезләмәгә ярашлы рәвештә, кергән тәкъдимнәрнең Комитет җаваплары белән җыелмасы басылып чыкты; 36 тәкъдимнең һәркайсы буенча дәлилләнгән позиция бәян ителгән.
Күтәрелгән темалар арасында – бинаның төп нөсхәсен саклау, түбә һәм балконнар буенча проект чишелешләре, объектның функциональ билгеләнеше.
Җыелма белешмәләр Комитетның рәсми сайтында урнаштырылган – монда