Питрәч районында XIX гасырның уникаль гыйбадәтханәсен торгызачаклар
Тарихи белешмә
Чиркәү 1875-1884 елларда беренче гильдия сәүдәгәре Павел Щетинкин акчасына төзелгән. Архитектура композициясе манараны, аш бүлмәсен һәм апсидалы төп күләмне үз эченә ала. Бинаның аермалы үзенчәлеге – керү урыныннан сул якта трапециясыман тәрәзә уемы.
Революциядән соң храм ябыла һәм яңадан төзелә: түбә өлеше һәм манарасы җуелган, эчтә кат аралары барлыкка килгән. Совет чорында биредә авыл мәктәбе урнаша. Бүген объект эшләми һәм авария хәлендә.
Хәзерге вакытта православие мәхәлләсе оештырылган, ул җирле халыкны һәм битараф булмаган кешеләрне берләштерә. Мәхәллә изге урынны торгызу өчен акча һәм хәйриячеләр эзләү буенча актив эш алып бара.
Торгызу проекты «Татарстан мәдәниятен үстерү» дәүләт программасы кысаларында эшләнгән. Комитет тарафыннан экспертиза үткәрелде, барлык кирәкле карарлар килештерелде.
Проектта түбәндәгеләр каралган:
· гыйбадәтханәнең һәм папертиның югалган күләмнәрен торгызу;
· манараның өске ярусларын торгызу;
· фасадларның сакланып калган һәм югалган декоратив элементларын реставрацияләү;
· иконостасны торгызу.
«Янсуардагы Покров чиркәве – XIX гасыр гыйбадәтханә архитектурасының ачык үрнәге. Озак еллар буена ул онытылып, җимерелеп барган. Бүген без аны торгызуга мөһим адым ясадык. Инициативаның халыкның үзеннән килүе аеруча сөендерә – мәхәллә оештырылган, кешеләр акча эзли, алар үз изге урыннарының язмышына битараф түгел. Бүген дини объектларны торгызу – өстенлекле бурычларның берсе. Гыйбадәтханә авылның бизәге һәм җәлеп итү үзәге булачак», – дип билгеләп үтте ТР Мәдәни мирас объектларын саклау комитеты рәисе Иван Гущин