Алабугада XIX гасыр ахыры сәүдәгәр йортын килештерелгән проект буенча реставрациялиләр
ТР Мәдәни мирас объектларын саклау комитеты Мәскәү урамы, 48 адресы буенча мәдәни мирас объектын саклау буенча фәнни-проект документациясен килештерде.
Сәүдәгәр йорты модерн элементлары белән эклектика стилендә XIX-XX гасыр чиге торак архитектурасы үрнәге булып тора. Объект республика әһәмиятендәге архитектура һәйкәлләре реестрына кертелгән. Шәһәр үзәгендә төзелеп, ул Алабуга сәүдәгәрләре өчен торак булып хезмәт иткән һәм шәһәр төзелешенең мөһим өлеше булган. 1917 елдан соң торак йорт яңадан планлаштырыла һәм күпфатирлы торакка җайлаштырыла.
Проект фасадларны реставрацияләү, тәрәзә-ишекләрне алмаштыру, болдырны ремонтлау, түбә япмаларын төзекләндерү, цокольнең табигый ташын чистарту һәм ремонтлау, керә торган аркалы кирпеч капкаларын һәм кирпеч койманы ремонтлауны күздә тота.
Бина гади төзелешләрдән төп фасадның гадәти булмаган композициясе белән аерылып тора. Бинаның төп керү урыны өч арка уемлы портик белән акцентлаштырылган, ярымколонналар белән бизәлгән.
Комитет рәисе Иван Гущин ассызыклаганча, реставрация бу кыйммәтле һәйкәлне киләчәк буыннар өчен сакларга һәм аңа элеккеге мәһабәтлеген кайтарырга мөмкинлек бирәчәк.