Арчада «сәнәк» күтәрелеше белән бәйле бина мәдәни мирас объекты булачак
Арчада ачыкланган «Шәһәр администрациясе бинасы, 1853 ел» мәдәни мирас объекты, уздырылган дәүләт тарихи-мәдәни экспертизасы нигезендә, Россия Федерациясе халыклары мәдәни мирас объектларының (тарихи һәм мәдәни һәйкәлләренең) бердәм дәүләт реестрына кертеләчәк.
Архив документларын җентекләп өйрәнеп, эксперт шуны ачыклаган: хәзер Интернациональная урамы, 39 адресы буенча урнашкан ике катлы кирпеч бина 14 елга соңрак – 1867 елда Богородица чиркәве каршындагы ике класслы мәхәллә училищесы өчен төзелгән. XX гасыр башында бинаның беренче катында бер сыйныфлы хатын-кызлар училищесы урнашкан, ә икенче катында – шәһәр думасы.
Йорт белән Арча өчен тагын ике мөһим вакыйга бәйле: 1917 елның 8 ноябрендә биредә Арча волостенең совет хакимияте игълан ителә, ә 1920 елның февраль-март айларында «сәнәк» яки «Игенче Кара бөркет» восстаниесе вакытында ул продразверстка дошманнары тарафыннан кулга алына.
Совет елларында биредә шәһәр администрациясе урнашкан – ачыкланган мәдәни мирас объектлары исемлегендәге исеме дә шуннан килә.