Зөядә төзелеш өчен шәһәр төзелеше регламентлары кертелә
Татарстан Рәисе Рөстәм Миңнеханов җитәкләгән шәһәр төзелеше эшчәнлеге мәсьәләләре буенча ведомствоара комиссиядә «Зөя авылы» тарихи җирлеге территориясе чикләрен билгеләүче проект, шулай ук аның сак предметы расланды.
Проект ТР Мәдәни мирас объектларын саклау комитеты заказы буенча эшләнде.
34 тарихи объект чикләргә кертелде
Тарихи җирлек территориясе чикләренә экспертлар тарафыннан шәһәр барлыкка китерә торган 34 тарихи кыйммәткә ия объект — посад утарлары, Успенская, Рождественская, Еленинская, Александровская һәм Никольская урамнарында, шулай ук Монастырский тыкрыгы һәм Зөя елгасы яр буенда урнашкан бер катлы агач йортлар кертелгән.
Регламентларда нәрсә язылган
Документта биналарның тарихи йөзен сакларга һәм бер үк вакытта инфраструктураны үстерергә мөмкинлек бирә торган шәһәр төзелеше регламентларына таләпләр билгеләнгән. Алар арасында:
· капиталь төзелеш объектларының мөмкин булган иң чик биеклеге;
· төсләр чишелешләренә һәм бизәкләү материалларына таләпләр;
· гомуми файдаланудагы янәшәдәге территориядән файдалануга һәм аны төзекләндерүгә таләпләр.
Типик архитектура чишелешләре
Проект капиталь төзелеш объектларының типик архитектура чишелешләренең 6 вариантын расларга тәкъдим итә:
· 3, 4 һәм 5 тәрәзәле бер катлы агач йорт;
· 3 тәрәзәле ике катлы агач йорт;
· 3 тәрәзәле ике катлы таш-агач йорт;
· мезонинлы өйләр.
Алар «Зөя авылы» тарихи җирлеге территориясен төзекләндерүнең традицион формалары һәм элементлары нигезендә эшләнгән.
Фәнни-проект документациясе нигезендә Комитетның тиешле боерыгы чыгарылачак.
Иван Гущин, ТР Мәдәни мирас объектларын саклау комитеты рәисе:
«Зөя – уникаль тарихи җирлек, анда һәр йорт – гомуми мәдәни ландшафтның бер өлеше. Расланган регламентлар һәм типик чишелешләр яңа төзелештә бу аутентичностьны саклап калырга мөмкинлек бирә. Бу үсешне «катыру» түгел, ә аның цивилизацияле кысалары: яңа йортлар аны җимермичә, тарихи мохиткә туры килергә тиеш».