1881 елгы Гуревич йорты мәдәни мирас объектлары реестрына кертеләчәк
ТР Мәдәни мирас объектларын саклау комитеты объектны реестрга кертү турында уңай нәтиҗә белән экспертиза актын алды.
Эксперт объектны, чын интерьерлар югалуга һәм планировканың соңрак чорларда үзгәрүенә карамастан, мәдәни мирас объектлары реестрына кертүне нигезле дип таныды, йортның тарихи, шәһәр төзелеше һәм архитектура-сәнгать кыйммәтләренә ия булуын билгеләп үтте. Тарихи бинаны дәүләт тарафыннан саклау дәвам иттереләчәк.
Элегрәк эксперт йортны ачыкланган мәдәни мирас объектлары исемлегеннән төшереп калдырырга киңәш иткән иде. Тарихи-мәдәни экспертиза акты Комитет тарафыннан эшләп бетерүгә җибәрелде.
Көллият регистраторы Дмитрий Гуревич йорты 1881 елда архитектор Петр Романов проекты буенча төзелгән һәм Казанның тарихи үзәгендә Островский һәм Астрономическая урамнары чатында урнашкан. Төзелеш стиле – иртә эклектика. Объектның тарихи кыйммәтен аның танылган сәүдәгәр һәм меценат Яков Шамов белән бәйләнеше өсти, ул бу йортны 1892 елда сатып алган.