Казансу елгасында һәлак булган сугышчыларга куелган һәйкәлдә ремонт-торгызу эшләре дәвам итә
Реставраторлар Казансу елгасы буендагы 1823 елгы «Һәлак булган сугышчыларга һәйкәл» мәдәни мирас объектын торгызу өстендә актив эшлиләр. Мәдәни мирас объектларын саклау буенча Татарстан Республикасы комитеты объекттагы барлык ремонт-торгызу эшләрен координацияли. Реставрация эшләренең күп өлеше башкарылган.
Объектта яр сызыгы көчәйтелгән һәм шпунт койма эшләнгән, территориянең нигезе финиш өслегенә әзер: ком, геотекстиль һәм вак таш катламнары салынган, беренче катта гидроизоляция тәмамланган, диварлар инъекцияләү ысулы белән ныгытылган, цоколь өлешенә гидроизоляция үткәрелгән.
Шулай ук 98% фасад тышлыгы сүтелгән, менү җайланмалары корылган, тарихи баскыч 90% ка торгызылган. Территория тирәли таш киртәләрне торгызу да дәвам итә - ул 80% ка төгәлләнгән, цокольне кирпечтән салу - 92% ка. Эчке бизәкләү: лепнина, штукатурка һәм ярыкларны бетерү эшләре алып барыла. Эшләр 85% ка башкарылган.
Реставраторларга түбәсен тулысынча торгызырга һәм тәресен алыштырырга, тарихи күренешкә туры килгән яңа ишекләр һәм тәрәзәләр куярга, гыйбадәтханә янындагы территорияне төзекләндерергә кирәк: күпер, парковка, павильон, яр буе һәм утрау зонасы яңаруны көтә.
Храм 1552 елда Казанны алу вакытында һәлак булган сугышчылар күмелгән урында салына. Бина архитектор Николай Алферов проекты буенча 1823 елда төзелгән. Елгага якын булу сәбәпле ишелү куркынычы астында булган.