Мишустин мәдәни мирас объектларына инвентаризация үткәрергә тәкъдим итте
РФ Премьер-министры Михаил Мишустин «РФ халыкларының мәдәни мирас объектларын саклау» стратегик сессиясендә мәдәни мирас объектларына инвентаризация үткәрергә тәкъдим итте. Беренче чиратта тиешле дәүләт реестрына кертелгән мәдәни мирас объектларына инвентаризация үткәрергә, аннары аларны хуҗалык әйләнешенә кертү өчен өстенлекләр буенча төзергә кирәк.
Мишустин ассызыклаганча, бу чара һәйкәлләрне тиешле хәлгә китерү өчен күпме финанс чаралары, белгечләр һәм вакыт кирәк булачагын төгәл билгеләргә мөмкинлек бирәчәк. Ул искәрткәнчә, РФ Президенты Владимир Путин үзенең Федераль Җыенга Юлламасында мәдәни мирас объектларын саклау мәсьәләсенә аерым игътибар бирде һәм мондый объектларны саклау һәм файдалану өлкәсендәге норматив базаны анализларга, кирәгеннән артык һәм каршылыклы таләпләрне бетерергә кушты.
РФ Хөкүмәте башлыгы Министрлар Кабинеты һәйкәлләрне саклау эшенә инвесторларны җәлеп итү өчен шартлар тудыра һәм моның өчен дәүләт ярдәме чараларын камилләштерә, шул исәптән пилот проекты да РФнең сигез субъектында - Байкал арты краенда, Түбән Новгород, Рязань, Самара, Смоленск, Тверь, Ярославль һәм Новгород өлкәләрендә эшләтеп җибәрелгән, дип өстәде.
"Инвестор реставрациягә чыгымнарын киметү өчен ташламалы ставка буенча заем ала. Алар тәмамланганнан соң ул объектның Хокук иясе була алачак, ләкин аны файдалану һәм тиешле хәлдә тоту бурычын үтәгәндә генә», - диде Мишустин һәм бу чараның нәтиҗәле һәм кирәкле булачагына ышаныч белдерде.