Татарстан Республикасының Баулы районында бронза гасырының уникаль артефактлары табылды

Баулы районының Исергәп авылында археологик казу эшләре бара, алар вакытында безнең эрага кадәр XVI-XIV гасырларга караган Ибракай тибындагы өч бронза урак һәм чуар керамика табылган. ТР Мәдәни мирас объектларын саклау комитеты рәисе Иван Гущин хәбәр иткәнчә, Исергәп авылында борынгы җирлек табылган, археология һәйкәле «Исергап-1» исемен алган. Казу эшләре сентябрь ахырында башланган, һәм бу вакыт эчендә археологлар бик күп кызыклы табылдыклар таба алган. Биредә, 1100 квадрат метр чамасы мәйданда, 15х6 метр зурлыктагы землянка табылган, ул керамик әйберләр ясау өчен балчык чыгару максатында кулланылган. Шулай ук зур таш эш кораллары һәм тагын өч бронза урак табылган. Бигрәк тә металлургия җитештерүе алга киткән бура культурасы халкына хас булган Ибракай тибына караган өч бронза урак игътибарны җәлеп итә. Урында эшләрне Россия Фәннәр академиясе галимнәре һәм Саратов белгечләре алып бара. Казу эшләрен ноябрь уртасына тәмамлау планлаштырыла.