«Күңел биреп эшләнгән»: Иван Гущин Ислам кабул итүнең 1100 еллыгы алдыннан Болгарның изге урыннарын карады
Мәдәни мирасны саклау буенча ТР Комитеты рәисе Иван Гущин Болгар шәһәре территориясендә урнашкан ЮНЕСКО объектларында үткәрелгән ремонт эшләренең барышын тикшерде.
Эшләр Татарстан Республикасы Президенты Рөстәм Миңнеханов кушуы буенча Идел буе Болгар дәүләтендә ислам динен кабул итүгә 1100 ел тулу уңаеннан уздырылган тантаналар алдыннан оештырылды. Болгарга сәфәре вакытында Иван Гущин Спас районы башлыгы Фәрит Мөхәммәтшин белән бергә 2022 елның 20 һәм 21 май көннәрендә төп чаралар узачак мәдәни мирас объектларын карады.
Подрядчы оешма вәкиле билгеләп үткәнчә, Болгар шәһәренең үзәк өлешендә бәйрәм алдыннан җәяүлеләр юллары тәртипкә китерелган, өстәмә яктырткычлар урнаштырылган, ә Болгар цивилизациясе музее янында су үткәргечне яңартканнар һәм үрне төзекләндерү эшләре башкарылган. Җәмигъ мәчете комплексында датөзекләндерү эшләре башкарылган. Борынгы диварларны махсус таш ныгытучы эретмә белән эшкәрткәннәр.
XVIII-XVIII гасырларда төзелгән Успение чиркәвендә интерьерларга косметик ремонт ясалган һәм бина буялган. Иван Гущин гыйбадәтханә диварларында вакыт-вакыт ярыклар барлыкка килүенә игътибар итте, шуңа күрә киләчәктә фундаментны ныгытырга кирәк.
Подрядчы оешма вәкилләре шулай ук «Хан төрбәсе», «Кара пулат» һәм Болгар шәһәрчегенең башка мөһим объектларында башкарылган эшләр турында сөйләделәр. ТР Мәдәни мирас объектларын саклау комитеты җитәкчесе эштәге кайбер җитешсезлекләргә тукталды, әмма тулаем алганда, торгызу чараларын югары бәяләде. «Эш лаеклы башкарылган, күңел белән эшләнгән», - диде ул.
Болгарга сәфәр нәтиҗәләренә аңлатма биреп, Иван Гущин билгеләп үткәнчә, борынгы һәйкәлләр комплексы Идел буе Болгар дәүләтендә ислам динен кабул итүгә 1100 ел тулу уңаеннан тантаналы чаралар үткәрүгә әзер. «Республиканың күп санлы кунакларын каршы алырга барысы да әзер, дип ышандырырга мөмкин. Подрядчы оешма тарафыннан соңгы эшләр башкарыла. Сәфәр барышында без шулай ук район һәм музей җитәкчелеге белән территорияне үстерү һәм музей составына керүче башка объектларда ремонт һәм реставрация эшләре үткәрү буенча якындагы планнар турында фикер алыштык», - дип шәрехләде Иван Гущин.